Familias! Axudádesnos a decorar o cole para o Nadal?

Un ano máis imos pedirvos axuda para facer algo fermoso entre todos e todas.

Nesta ocasión, a idea é que cada familia que queira colaborar traia un afeite, un adorno, un elemento decorativo, calquera que se lle ocorra e de calquera material e tamaño; se pode ser de refugallo, mellor (algo que teñades por casa e que poidades reutilizar para isto). Os máis pequenos usarémolos para decorar a nosa xa habitual árbore de fieltro e, os máis grandes, servirán para engalanar o patio cuberto, a entrada e mesmo a zona exterior. Polo tanto, poden ser desde bólas para a árbore ata bonecos de neve, casiñas de cartón, siluetas de personaxes de Nadal, algo de plástico para poñer fóra como un lazo... o que se vos ocorra e vos apeteza facer.

A nosa idea é poder decorar a principios de decembro, así que tedes tempo a traer as vosas achegas ata a fin deste mes de novembro. Os nenos e nenas poden entregar os adornos ás titoras e elas encargaránse de facérnolos chegar.

Grazas de antemán e ánimo, que de seguro faremos algo ben bonito.

A colaboración das familias é vital para o bo funcionamento dos servizos

Estimadas familias:

Ultimamente estamos a detectar moitas incidencias na comunicación de asistencias e non asistencias aos servizos de comedor e madrugadores, así que, mediante esta comunicación, queremos explicarvos a importancia de que todos colaboremos para que estes funcionen correctamente e coa calidade que merecen os nosos fillos e fillas.

Como xa sabedes, para facer uso dos servizos de comedor e madrugadores temos que darnos de alta na aplicación web www.comedorcentieiras.com e, unha vez de alta, é a nosa responsabilidade apuntar e desapuntar aos nosos nenos e nenas. Podemos facelo por días, por semanas, por meses, por curso ou como queiramos, pero lembrade QUE TEMOS ATA AS 8.15H  DO MESMO DÍA PARA MADRUGADORES E ATA AS 9.15H PARA O COMEDOR PARA APUNTAR E/OU DESAPUNTAR. Esta opción permite que, se un neno ou nena esperta enfermo e non vai ir ao cole, temos tempo de desapuntalo; se vai haber unha festa ese día e imos ir recollelo en vez de deixalo no comedor, debemos desapuntalo; se ao final libramos un día que non tiñamos previsto e imos ir recollelo, debemos desapuntalo, etc. E ao revés, se un día nos xorde algo e non imos poder recollelo, podemos apuntalo no mesmo día. Pero... ollo!, se non chegamos a tempo e non o apuntamos, NON PODE QUEDAR.

Por que é tan importante que a asistencia estea rexistrada?

- O servizo ten unha ratio legal determinada de persoas coidadoras por persoas usuarias. Se veñen nenos sen estaren apuntados, podemos superar a ratio e non temos dispoñible o reforzo necesario de persoal.

- Os menús veñen contados polo número de nenos/as que están apuntados ás 9.30h de cada día. Se veñen nenos sen estaren apuntados, hai que repartir a comida.

Por que é tan importante que, se non vai ir ao comedor e o sabemos o mesmo día a primeira hora ou antes, o desapuntemos?

- Se está apuntado/a e non asiste, temos que cobrar igual o servizo porque está xa contratado e vai vir menú para ese neno/a.

- De novo, o tema da ratio; se contamos con 20 e veñen 19 non precisaríamos o reforzo de persoal coidador que vai vir e imos ter que asumir entre todos e todas.

E, sobre todo, por RESPONSABILIDADE. Para que os servizos funcionen correctamente precisamos que as familias tamén poñades da vosa parte e entendades a importancia de comunicar as asistencias e as non asistencias. Se os apuntades por mes, lembrade poñer unha alerta ou apuntar na axenda para que, cando empece outro mes, lembredes ir á aplicación e marcar os días correspondentes e, se hai cambios, por favor, non esquezades rexistralos.

Lembrade que tedes toda a información sobre isto sempre dispoñible neste blog; tanto nas lapelas de comedor e madrugadores como na ligazón permanente ás Instruccións sobre o uso da web de xestión de comedor e madrugadores.

Grazas de antemán pola vosa comprensión e colaboración!

Samaín e Magosto 2024, grazas e ata o próximo

 

Un ano máis, en Centieiras celebramos o Samaín e o Magosto, desta volta, todo xunto. Comemos as castañas e o chocolate cos disfraces máis terroríficos e bailamos os peóns en modo zombie e ensaguentados. Non faltou a repichoca de música popular coa participación de moitos nenos e nenas nunha xornada na que a o cole e a ANPA unen as súas forzas para traballar en conxunto e ofrecer o mellor de si aos pequenos/as e ás familias.

Moitas grazas a todas as persoas que o fixeron posible e ás mans que nos botaron desinteresadamente. Primeiro reto do curso superado!!

Precisamos a túa axuda para preparar o Magosto

Xa está aquí un dos acontecementos do curso en Centieiras: o Magosto! Este ano conmemorámolo tamén co Samaín e o Día do Peón, así que día completo. Será o vindeiro mércores 30 de outubro e as familias estades convidadas a partir das 12h a unhas castañas e un chocolate quente do que nos ocupamos dende a ANPA. 

As castañas xa as temos encargadas e estarán no cole o luns. Son 25 kg que asarán na Panadería O Cruce de Maniños e outros 5 kg que asaremos na pista cunha castañeira moi especial... 

O martes 29 estaremos picándoas e solicitamos a vosa axuda. Quenes poidades, achegádevos ao centro pola tarde, a partir das 16h e traede un coitelo pequeno. Cantos máis sexamos antes acabamos.

Grazas de antemán!

Asinamos o convenio para a subvención nominativa do noso comedor

Esta mañá asinamos no Concello de Fene, xunto con outras entidades, o convenio para a subvención nominativa que recibe todos os anos o noso comedor escolar para que poida seguir funcionando. Son agora un total de 3000 euros que permiten que poidamos seguir xestionando este servizo tan necesario para o noso cole.

Grazas de novo ao Concello de Fene e grazas á nosa compañeira da xunta directiva, Jessi, que puido achegarse ao acto da sinatura.

Robótica, creatividade e tenis comezan en outubro

Das actividades extraescolares propostas pola ANPA, finalmente, as que acadaron o mínimo de alumnado para impartirse son as seguintes:

As actividades comezan co mes de outubro e rematan co mes de maio. O pago debe facerse por adiantado, nos cinco primeiros días de cada mes, mediante ingreso ou transferencia á conta bancaria da ANPA:  ES30 2100 4736 8102 0003 1870 (Caixabank-Perlío).

Poderán cancelarse as actividades durante o curso se se producen baixas ata menos do número mínimo de alumnado.

Grazas a todos/as e a gozar delas!!

Asemblea de socios o martes 1 de outubro. Participa e cóntanos o que queiras; é o momento!

A ANPA convoca a todas as familias do alumnado do CEIP Plurilingüe Centieiras á súa Asemblea Xeral Ordinaria anual, que terá lugar o MARTES 01/10/2024, ás 16h en primeira convocatoria e ás 16.15h en segunda convocatoria, no recibidor da escola, coa seguinte orde do día:

1. Lectura e aprobación, se procede, da acta anterior

2. Estado de contas e balance do curso 2023/2024

3. Proposta e aprobación, se procede, de renovación da Xunta Directiva

4. Previsión de actividades e xestións para o curso 2024/2025

5. Dación de contas dos requirimentos das familias na última asemblea xeral (porteiro automático porta traseira, traspaso á Xunta da xestión do comedor, cambio de conta bancaria)

6. Rogos e preguntas

 

Tenis, balonmán, robótica, creatividade, cociña, inglés... apuntádevos ata o 20 de setembro!

Neste curso podemos propoñervos desde a ANPA as seguintes actividades, cos horarios e prezos que vedes no cadro:

Ollo! 👀👀👀 O prazo para apuntarse remata o 20 de setembro e lembrade que só se impartirán se se alcanza o mínimo de alumnado proposto.

Seguimos apostando polo tenis de Justo al Revés e engadimos, como actividade deportiva, o balonmán. 

En canto ás actividades creativas, temos:

- Robótica educativa; unha actividade STEM pensada para pequenos inventores e inventoras baseada en Lego wedo 2.0 e EV3 Mindstorms, que combina elementos de ciencia, tecnoloxía matemáticas e creatividade. 

- Creatividade; experimentos, manualidades, expresión corporal, ritmo, educación medioambiental... unha ampla gama de experiencias divertidas e ao mesmo tempo educativas.

E a maiores, inglés con xogos, dinámicas, conversa e vocabulario; e cociña, con receitas e hábitos de alimentación saudable.

Impartiranse as actividades que alcancen o mínimo de alumnado sinalado no cadro, así que animádevos e apuntádevos canto antes (ata o 20 de setembro). Para facelo tedes que enviar un correo electrónico a anpa.centieiras@gmail.com cos seguinte datos:

- Nome do alumno ou alumna

- Curso

- Teléfono móbil de contacto. 

As actividades que saian comezarán en outubro e rematarán en maio.

Estamos de volta!

Parece que foi onte cando comezaban, pero o caso é que están a piques de rematar as vacacións de verán e na ANPA xa estamos traballando para que todo funcione o mellor posible no colexio.

Como é habitual, os servizos de comedor e madrugadores funcionarán desde o primeiro día, o mércores 11. Tedes dispoñible o menú de setembro da parte dereita deste blog e xa sabedes que, os que aínda non estades, tedes que darvos de alta na web de xestión de comedor e de madrugadores para poder apuntar aos vosos nenos e nenas os días que o precisedes. Toda a información na lapela correspondente deste blog e na ligazón da parte dereita.

Canto ás actividades extrescolares, estamos a preparar a oferta que temos para este curso e nestes días vos daremos toda a información. Coma sempre, comezariamos en outubro e rematariamos en maio.

Polo demais, xa podedes irvos facendo socios e socias. Sabedes que precisamos que vos fagades para que a ANPA poida seguir funcionando e ofrecendo todos os servizos ás familias. A cota non sobe neste curso; seguen a ser 25€ por familia e curso que podedes ingresar na conta habitual. Os que vos asociades por primeira vez ou tedes algún neno ou nena novo no cole, lembrade cubrir e enviar a ficha de datos. Tedes tamén toda a info na lapela correspondente.

Que teñades unha feliz volta e para calquera dúbida podedes contactar con nós a través do correo anpa.centieiras@gmail.com ou polo whatsapp do noso teléfono móbil 623009449.

Feliz verán e a repoñer forzas para a volta!

Despedíamos o curso o pasado venres coa Festa da Convivencia de Centieiras que, unha vez máis, foi todo un éxito grazas ás familias, que nunca nos fallades. O tempo portouse ben e deixounos gozar da comida campestre, dos xogos con auga, da festa da espuma e dunha xornada, en xeral, chea de momentos para lembrar.

O vindeiro ano máis e mellor e agardámosvos de novo a todos e todas, así como ás novas familias que veñan. En canto ao alumnado de 6º de Primaria, que vos vaia moi ben na vosa nova etapa e que levedes sempre a Centieiras nos vosos corazóns. Botarémosvos de menos!

Deixámosvos un vídeo resumo do que aconteceu este venres 21 de xuño e agardamos que pasedes un marabilloso verán.