Preparámonos para a Comparsa de Centieiras. Animádevos todos e todas!!

Un ano máis...

 

A ANPA Centieiras estamos a organizar unha Comparsa para participar no desfile do Mércores de Cinza do Concello de Fene, que este ano cadra no 22 de febreiro (festivo local). É unha das actividades máis divertidas e interesantes das que facemos durante o curso e coa que tentamos acadar varios obxectivos:

- Traballar en equipo con adultos/as e pequenos/as

- Coñecernos mellor 

- Dar a coñecer o noso colexio e as cousas tan bonitas que se fan nel

- Participar dunha das festas máis importantes do noso Concello

- Conseguir uns cartos que, unha vez sufragados os gastos da comparsa, repartimos entre os nenos e nenas que participan

- Pero ante todo e sobre todo... pasalo xenial!!

Nesta ocasión, xa sen restriccións sanitarias, precisamos un mínimo de 20 persoas maiores de 16 anos para participar como "comparsa de adultos de Fene", que é a categoría que pode acadar un premio maior. Polo tanto, animamos a todos os papás, mamás, profes, tíos, avoas, curmás, amigos, etc. a que veñan con nós de Comparsa.

Os disfraces para os pequenos serán os mesmos que usen para a festa do colexio, e para as persoas adultas argallaremos algo moi sinxelo. Xa temos preparadas cancións con música de ACDC e de Rosalía e, en breve, comezaremos a ensaiar os bailes.

Que supón para as familias?

O día do desfile, as persoas menores que queiran participar estarán a cargo da ANPA desde a hora na que sexamos convocados polo Concello (normalmente sobre as 17.30h) e ata que rematen todos os actos das comparsas (normalmente sobre as 20.30h). Ocupámonos tamén de darlles a merenda e auga. En canto aos ensaios, adoitamos facer dous ou tres na semana anterior (non é necesario acudir a todos) e un último o mesmo día do desfile sobre as 16h.

Que hai que facer para apuntarse?

Só tedes que enviar un correo electrónico (anpa.centieiras@gmail.com) ou whatsapp ao móbil da anpa (623009449) desde hoxe e ata o vindeiro día 12 de febreiro. Tedes que especificar o seguinte:

- Para persoas adultas: nome e apelidos, DNI, data de nacemento e teléfono móbil de contacto

- Para menores: nome e apelidos, curso (se son alumnado de Centieiras) e data de nacemento

Faremos un grupo de whatsapp da Comparsa coas persoas que vos apuntedes. Aí enviaremos as cancións e iremos informando de todo o que se faga. 

Non volo perdades que, de seguro, pasarémolo moi ben!!

Xa se poden consultar os rexistros de días pasados na aplicación de comedor/madrugadores

A ferramenta informática de xestión do comedor vén de incluír unha importante mellora para a información ás familias. Ata agora, unha vez pasadas as 9.15h da mañá de cada día, os rexistros desaparecían da vista das persoas usuarias, sen que puideran comprobar os días que os seus fillos/as estiveran apuntados no comedor e/ou en madrugadores a non ser que preguntasen á ANPA. A partir de hoxe xa poden comprobar todos os rexistros anteriores á data actual con só abriren a aplicación.

Desde a directiva queremos dar as grazas e recoñecer publicamente o labor de Javier Lamas e Pedro Rodríguez, artífices desta ferramenta que tanto facilita a xestión dos servizos, tanto á ANPA como ás familias e ao centro.

Preparando o Día da Paz...

O noso equipo artísitico volve á carga e comeza o ano con estes bonitos carteis para o día internacional da paz, que se conmemora o próximo 30 de xaneiro e que no noso cole sempre é unha data destacada. E nesta ocasión, por desgraza, máis necesario ca nunca...

Suspensión da actividade de xadrez a partir de febreiro

Por baixa de alumnado, a partir do mes de febreiro queda suspendida a actividade extraescolar de xadrez. Grazas a todas as persoas anotadas e agardamos que gocedes dos días que quedan neste mes.

O cadro de actividades quedará en febreiro deste xeito:

 

Cantas ganas tiñamos dun Nadal así!!

Pois por fin chegou o día e Papá Noel puido achegarse ao noso cole e visitar a todos os nenos e as nenas. Houbo de todo: os que non querían sentarse nas pernas de Papá Noel, os que se achegaban timidamente e con moita emoción, as que lle deron o máis forte dos abrazos e ata as que quedaron sen palabras, pero o caso é que estivo con nós e puidemos volver a velo de preto. Ah! E repartiu tamén un pequeno agasallo a cada peque de parte da ANPA!

A de hoxe foi unha xornada festiva desde primeira hora, e a iso das 12 tomamos as uvas ou gusanitos todos/as xuntos/as na pista. Foi moi divertido! Despois, sorteamos a nosa cesta e a man inocente sacou o número 100, que o tiña nada máis e nada menos que a persoa que se encarga da limpeza do cole. Parabéns Yoli! Que goces moito dela!

E ata aquí o primeiro trimestre deste curso. Pasade moi boas festas e vémonos á volta!!

Temos os mellores calendarios de 2023. Non quedes sen eles!

Como xa é habitual, a ANPA edita calendarios de sobremesa de 2023 coas fotos de todas as aulas e outras relacionadas co cole. Repartirémolos nas seguintes datas e horas:

Luns 19 e martes 20 de decembro: 

De 9:00 a 9:30h e de 13:45 a 14.15h na pista cuberta

De 15.30h a 16:30 no patio cuberto

A doazón é de 3€. Moitas grazas a todos/as pola colaboración e, de novo, a Marisa Rey polas fotografías.

Nadal feito á man e coa mellor das axudas

O noso equipo artístico xa colocou a árbore de Nadal xigante decorada coas bólas que nos fixeron os nenos e nenas que quixeron colaborar. Moitas grazas a todos e todas! Non hai árbore máis bonitiña en toda a volta!

Agradecemos tamén a colaboración da Mercería Costuras, que nos deu caixas para facer os paquetes decorativos.

Ademais, complementamos con outras decoracións que fan que se respire Nadal por todos os recantos  de Centieiras. 

Agardamos que vos encante!!

Sorteamos unha cesta de Nadal! Non quedes sen rifas!

Grazas á doazón dunha familia, este ano conseguimos unha cesta de Nadal que queremos sortear entre toda a comunidade educativa do noso cole. Está chea de produtos marabillos para facer que nestas festas non falte de nada na mesa do afortunado ou da afortunada a quen lle toque.

O sorteo será o día 22 de decembro, durante a celebración da festa de fin de trimestre do cole. Publicaremos o número gañador, polo que non será necesario estar presentes para que toque. Ademais, reservamos os números de socia de cada familia, co que as familias asociadas terán máis posiblidades...

Repartiremos rifas nestes días ás entradas e saídas do cole, e tamén en madrugadores e no comedor. A doazón para a ANPA é de 1 €. 

Non quededes sen rifas!!!

Solicitamos axuda das/os peques para decorar a nosa árbore de Nadal

Como cada ano, o noso equipo artístico prepara unha árbore de fieltro xigante para contribuir á decoración de Nadal do colexio. Nesta ocasión queremos que os nenos e as nenas nos axuden e que, de paso, formen parte activa desta conmemoración que, para eles/as, é tan importante... 

Este venres día 2 levarán para casa unha bóla de cartón como a da foto e queremos que a decoren como queiran (con pinturas, con pegatinas, con debuxos ou cos materiais e deseños que lles apeteza). Engaden unha corda, lazo, fío ou o que teñan por casa para colgar e listo! 

Pregamos que as traian decoradas o luns 5 ou o mércores 7, así poderemos ter a árbore lista a vindeira semana para que gocen dela o maior tempo posible.

Grazas anticipadas pola colaboración! Seguro que nos queda unha árbore marabillosa!

Instalado en Centieiras o buzón máxico de Nadal

Familias! Xa podedes dicirlles aos vosos/as peques que teñen dispoñible o buzón máxico de Nadal, no que poden botar as cartas coas peticións para os seus personaxes favoritos destas datas. Botándoas neste buzón chegarán sempre a tempo e ao destinatario que elas e eles queiran: Papá Noel, Apalpador ou os Reis Magos.

Está na entrada do cole. Bulide, que o tempo pasa moi rápido!!!