O traballo en equipo sempre sae mellor, e cando o equipo é de pequenas e pequenos artistas dando outra vida a materiais de refugallo, a fachenda que sentimos é infinita. Deixámosvos unhas fotos e un enlace a un vídeo de como quedou o poboado de Nadal de Centieiras feito polo alumnado. Moitas grazas aos participantes e a gozar del nestes días.
Proximamente aumentaremos a decoración e poñeremos unha árbore de Nadal moi especial...
Pincha aquí para ver o vídeo do poboado Nadal Centieiras
Un curso máis, o Concello de Fene vén de asinar o convenio con esta asociación para o ingreso dunha subvención nominativa de 2.400 € para sufragar gastos do servizo de comedor. A nosa compañeira Celia acudiu esta mañá ao acto público de sinatura, xunto con outras asociacións que tamén recibiron fondos.
Ademais, hoxe mesmo veñen de anunciarnos, desde os departamentos de Cultura e de Ensino, que nos foi concedida unha subvención de concorrencia competitiva por 1.500€, que é o máximo establecido para entidades como a nosa. Esta partida deriva das actividades que realizamos diferentes ao comedor, nomeadamente o servizo de madrugadores, pero tamén as conmemoracións que adoitamos facer ao longo do curso (Magosto, Samaín, Nadal, etc).
Estamos á espera agora da constestación, por parte da Xunta de Galicia, dunha segunda subvención que solicitamos para gastos de comedor. Manterémosvos informados/as!
Gústavos o supermural que fixeron as nosas artistas para conmemorar o día internacional para a eliminación da violencia contra as mulleres, que se celebra mañá xoves?
Agardamos que contribúa á concienciación nos nosos peques sobre esta lacra que non nos quere deixar vivir en igualdade e en liberdade. Eles e elas son o futuro e está nas nosas mans educalos para que desapareza.
Tal e como xa anunciou o cole a través do Abalar, o noso equipo artísitco prepara a creación dun poboado de Nadal que vai deixar sen palabras ata a algún alcalde... Para iso precisamos a colaboración dos nosos pequenos e pequenas.
Con cartón, caixas de zapatos ou o que teñan por casa, poden facer casiñas, vexetación, pontes, sinais de tráfico, estacións, marquesiñas, ou calquera cousa que se lles ocorra que pode haber nunha vila de hoxe en día. Teñen ata o vindeiro venres 26 para achegar as súas creacións ao cole e deixarllas ao titor ou titora, que xa se encargará de facérnolas chegar.
Agardamos que poidades ver o poboado nos primeiros días de decembro. Grazas de antemán e animádevos a colaborar!!
Deixámosvos unhas fotos que poden servir como idea, pero lembrade que poden facer calquera elemento dun poboado. Estas están feitas por adultos; non fai falla que sexan tan perfectas!
O próximo luns día 22 de novembro, entre as 16 e as 18h, na Biblioteca do cole, todos os pais, nais e/ou titores legais do alumunado podedes participar na elección de dúas representantes das familias no Consello Escolar do centro. Trátase dun órgano de vital importancia na xestión da escola, e nel están representados, ademais das familias, a dirección, o profesorado, o Concello de Fene e o persoal non docente.
As familias temos cinco representantes no Consello Escolar, unha en representación da ANPA e outras catro que se escollen mediante votación cada dous anos, nos que se renovan dúas das catro. O curso pasado tocaba renovar, pero a pandemia impediuno; así que este ano hai que escoller dúas novas representantes neste órgano que toma decisións e debate sobre temas de vital importancia para os nosos fillos e fillas.
Hai seis candidatas para esta ocasión, ás que xa de antemán felicitamos e agradecemos a súa disposición; son Silvia, Paula, Mª Raquel, Auria, Cristina e Lorena. Cada votante escolleremos tres nomes desta lista, e as dúas máis votadas serán as novas representantes das familias no Consello Escolar, xunto con outras dúas que foron escollidas en 2018 (Alejandra e Yolanda) e coa representante da ANPA (Ledicia).
Participade! É o voso dereito!
Hoxe estamos de festas tradicionais e isto ten que notarse. Mirade que recucho máis apañado fixo o equipo artístico con refugallo, pezas realizadas o ano pasado, e elementos da natureza...
Onte celebrouse a Asemblea Xeral Ordinaria da ANPA. Demos conta do balance de actuacións e económico do curso pasado, aprobamos a acta anterior e incorporamos dúas novas persoas á Xunta Directiva. Benvidas Silvia e Olaia e moitas grazas!! Tamén demos conta da baixa de Héctor, ao que tamén agradecemos a axuda prestada no tempo que formou parte do equipo.
O resumo contable está a disposición de calquera persoa asociada que queira velo, poñéndose en contacto con nós polas vías habituais. Agardamos que no presente curso poidamos facer máis cousas ca no anterior, aínda que sempre coa prudencia que require a situación sanitaria.
Moitas grazas ás persoas que acudiron e animamos a todas as demais a que participen con nós en todo o que poidan. Tedes toda a información do que facemos e quenes somos aquí: http://ceipcentieirasanpa.blogspot.com/p/quen-somos.html
Desde a actividade extraescolar de Obradoiro de Arte, que se imparte no cole os xoves de 16 a17h, mándannos unhas fotos das cousiñas que fixeron para o Samaín. Mirade que terrorífico!!
Tamén quedan prazas en xadrez e en inglés, e para apuntarvos só tedes que comunicárnolo. Toda a info en http://ceipcentieirasanpa.blogspot.com/p/actividades-extraescolares.html
O equipo artístico da ANPA púxose en marcha para ambientar o cole do xeito máis terrorífico. Grazas a todas as persoas que colaboraron para que puidésemos facer isto e agardamos, coma sempre, que guste a grandes e pequenos.
As cabazas están enteiras e son da horta, recolleitadas en Maniños. Se alguén quere levar para a casa e aproveitalas como decoración para esta fin de semana ou para facer receitas con elas, pode coller as que queira o venres á saída do colexio.
A ANPA convoca ás familias do alumnado do CEIP Plurilingüe Centieiras á Asamblea Xeral Ordinaria anual que terá lugar o martes 2/11/2021, ás 17:30 horas en 1ª convocatoria e ás 17:45 horas en 2ª convocatoria, no patio cuberto do colexio, coa seguinte orde do día:
Lectura e aprobación, se procede, da acta anterior.
Estado de contas e balance do curso 2020/2021.
Proposta e aprobación, se procede, de renovación da Presidencia e outros cargos da Xunta Directiva.
Previsión de actividades e xestións para o curso 2021/2022.
Rogos e preguntas.