Chega por fin a festa de convivencia de fin de curso organizada pola ANPA. Será o venres 20 de xuño, último día de cole, xusto ao remate do horario lectivo, é dicir, ás 14 h.
Comezamos cun xantar de convivencia todos xuntos nos exteriores do colexio. Cada familia deberá encargarse de traer a súa comida, pero non fai falla que traiades nada máis; a ANPA convida a xeados, postres variados, cafés e augas. Despois do xantar faremos un sorteo de agasallos coas rifas que adquirades. Nesta ocasión temos varios paquetes marabillosos e unha super sorpresa final. Lembrade que a vosa axuda é moi importante para que poidamos seguir facendo esta festa... Ah! E as familias socias teredes unha oportunidade a maiores xa que, ademais das rifas que merquedes, entrarán no sorteo os vosos números de asociadas.
Non faltará, por suposto, a festa da espuma, que este ano comezará ás 16 h e durará ata as 17h. Despois, tempo libre ata o fin de festa, que será ás 19.30 h.
Os nenos e nenas poderán traer e xogar coas pistolas de auga, que nunca faltan nesta celebración. Habilitaremos no exterior baldes de auga para enchelas posto que, baixo ningún concepto, poderá facerse nos baños. Tampouco estará permitido uso de globos de auga dada a dificultade da súa limpeza e o seu alto nivel contaminante.
Estades convidadas todas as familias no sentido extenso, con avós, curmáns, tías, sobriños e quen queira apuntarse.
Animádevos todos e todas a recibir o verán como merece!!
Ningún comentario:
Publicar un comentario