Parece mentira pero xa rematou o curso 2024/2025. A festa da convivencia, como é habitual, puxo o punto final a este período con sorrisos, xogos, auga, espuma, xeados, agasallos... e compartindo unha xornada con familias, profes, irmáns maiores, curmáns e algún que outro avó e avoa. Agradecemos de corazón que vos animarades a pasar con nós esa tarde e desexamos que teñades moi bó verán e que voltedes en setembro coas baterías cargadas, tantos os nenos e nenas como as profes e as familias.
Neste curso temos que agradecervos moito ás máis de cen familias que vos fixestes socias da ANPA e que, coa vosa axuda, propiciades que poidamos facer actividades como esta festa de convivencia, o Magosto, a visita de Papá Noel, as axudas á excursión de fin de curso, etc. Agardámosvos o curso que vén e animamos a todas as familias que non o fixeron a que se fagan socias da ANPA, sobre todo ás novas incorporacións, ás que desde xa damos a benvida a Centieiras.
Aos nenos e nenas de 6º de primaria, que sexades felices alá onde comecedes a nova etapa que vos toca e que levedes sempre a Centieiras no corazón. O mesmo queremos desexar ás familias destes nenos que, exceptuando as que quedan con irmáns ou irmás pequenas, rematan tamén unha etapa en Centieiras.
Como ANPA, nesta ocasión, non podemos deixar de destacar a despedida de dúas persoas que forman parte da xunta directiva desta asociación desde hai moitos anos e que sempre estiveron aí cando se lles precisou, nas duras e nas maduras, nos momentos bós e nos regulares, sen renderse nunca e traballando incansablemente: Paula e Mari, grazas infinitas e sorte na nova etapa.
Do mesmo xeito, celebramos e agracedecemos a incorporación de novas mamás á xunta directiva neste curso (Gloria, Rocío e Natalia) e de cara ao que vén (Laura). Contamos con vós e de seguro que seguiremos traballando para que os nenos e as nenas de Centieiras conten con todos os servizos que merecen e coa mellor calidade posible.
Grazas e que pasedes moi feliz verán!
Ningún comentario:
Publicar un comentario